El Ministry of Basic, Higher, and Technical Education na Bangsamoro Autonomous Region in Muslim Mindanao (MBHTE-BARMM) ya inagura con el nuevo construido dos andanas edificio de oficina del division de escuelas na Bongao, Tawi-Tawi.
Asegun con el MBHTE, si Abdullah Salik, Jr., el MBHTE Director General para el educacion basica, ya encabesa con el ceremonia de inaguracion del P38 millon proyecto por parte de Ministro Mohagher Iqbal del MBHTE-BARMM.
Presente durante inaguracion del proyecto si Dr. Lermalyn Sanggogot, el oficial-en-cargao del division de escuelas, y el mga losdemas oficiales del oficina regional del MBHTE, representantes del gobierno provincial y otros mga visita de diferentes agencias.
El nuevo construido edificio ay replaza con el presente edificio del oficina del division del MBHTE que mas de 40 años ya ta usa mga oficiales y personajes del agencia.
El division del MBHTE na Tawi-Tawi esperansao reloca para na nuevo oficina na otro mes, coincidiendo con el preparaciones para el proximo encuentro provincial programado na mes de Febrero.
Asecun con el MBHTE, el nuevo facilidad es un testamento del compromiso del ministerio para proporcionar calidad y educacion holistica para de todos, asegurando un buen futuro del mga estudiantes y educadores y manteniendo el eslogan de “Ningún estudiante de Bangsamoro se queda atrás”.
El establisida del nuevo edificio de oficina alineao con el 12 puntos agenda prioritaria del Jefe Ministro Abod Ebrahim del BARMM. (B. Garcia, photo courtesy of MBHTE-BARMM)