Muerto el man maridable na un incidente de emboscada na costa este de ciudad de Zamboanga, asegun con el policia local del Martes.
El policia local ya identifica con el man maridable victima como canda Hamid Tumambid, y su esposa, si Fatima, ambos 36 años el edad y mga residentes del Sitio Dulian, Barangay Calabasa, ciudad del Zamboanga.
Asegun con el policia, con el man maridable ya embosca mga alas 3:40 del Martes aga na Sitio Aplaya, Barangay Buenavista, ciudad de Zamboanga.
Base na investigacion, ta maneja motorciclo si Hamid y ya sigi conele ancas si Fatima cuando tiene mga desconocidos armao personas ya embosca canila que ya resulta na de ila enseguidas muerte.
Base na informacion ya obtene el policia, el mga suspechao ya escapa para na buugan del Sitio Aplaya, Barangay Buenavista.
El mga autoridad ya recubri 10 capsula de un rifle na lugar del crimen.
Inicialmente, el policia ta mira cay el motivo del incidente un peleya contra otro familia. (B. Garcia)