El mga autoridad ya confisca P17.5 millon valor de contrabando na un isla barangay na provincia de Sulu, asegun con el policia del Martes.
Asegun con el Regional Maritime Unit Bangsamoro Autonomous Region (RMU BAR) del Philippine National Police, con el mga contrabando compuesto de 200 cajon de cigarillo ya confisca mga alas 9 del Domingo denoche na isla barangay de Bubuan, Hadji Panglima Tahil, Sulu.
Asegun con el policia, el mga personajes del Sulu Maritime Police Station (MARPSTA) ya conduci operacion contra smuggling que ya resulta na capturada de un pambot que ta contene 200 cajon de smuggled cigarillo.
El policia ya habla, el mga confiscao smuggled cigarillo tiene el valor de P11.5 millones, con omento P6 millones perdicion de impuesto del gobierno llevando el total de P17.5 millones.
Con el mga confiscao cigarillo ya entrega na custodia del Buro de Aduana para el propio disposicion.
Asegun con el policia, el mga smugglers ya adopta tactica de usa’r pambot para transporta con el mga cigarillo para distribui na mga compradores na provincia de Sulu con el objetivo evita con mga autoridad. (B. Garcia) (Photo Courtesy of RMU BAR)