Tres personas, incluwido un elejido oficial de barangay, el ya iri na un incidente de tiro na costa weste del ciudad de Zamboanga.
El incidente ya ocuri mga alas 4:40 del tarde del Domingo na carretera nacional na Barangay Sinubong na costa west de este ciudad.
Asegun con Police Major Ramon Aquiatan, el hefe del Zamboanga City Police Station 10 (ZCPS10), con el mga victima ya conose como canda Lopito Arola, 47 años el edad y barangay kagawad del Patalon, este ciudad; Ariela Lopito 10 y si Kim Audrey Nunesco, 14 años el edad.
Asegun con Aquitan cay ta maneja motorsiclo si Arola y ta sigui ancas conele canda Lopito y Nunesco cuando ya tira usando calibre .45 pistola con el kagawad el uno del dos desconosidos personas muntao na otro motor que ya sigi na atras del mga victima.
Su dos uban ya iri cuando ya tumba el motorsiclo ta maneja si Arola cay ya resbala el manibela na su mano despues que ya tupa con ele el bala na su hombro derecha.
Con Arola y su dos uban ya lleva na Labuan General Hospital y despues ya transferi para na Zamboanga Peninsula Hospital para el curada medical.
El ZCPS10 ta continua el investigacion para sabe si quien el mga echor para el posible aresto del mga suspechao na incidente. (B. Garcia)