Un estudiante de colegio ya muri na un incidente de ensendio o kema que totalmente ya destrosa un casa y porcion del otro dos casa na Barangay Guiwan, este ciudad.
Si Superintendent Christopher Morales, el hefe del Zamboanga City Fire District, ya nombra con el victima como si Mark Nathaniel Aguinid, 20 años el edad y un estudiante de un universidad aqui na ciudad de Zamboanga.
Asegun con Morales el kema ya ocuri mga alas 8:13 del aga del Lunes na Perez Drive, Barangay Guiwan, este ciudad.
Asegun con Morales, cay base na investigacion, si Aguinid ya muri na kema cay dromido le y nohay mas ele puede sale o escapa durante el ensendio.
Asegun na investigacion cay solo-solo lang tamen si Aguinid na casa cuando ya ocuri el kema.
Si Morales ya habla cay con el fuego ya puede completamente apaga mga alas 9:20 del aga y el estimao destroso de propiedad ya alcansa na cantidad de P100,000.
Ta continua pa el investigacion del bombero para sabe si cosa el causa del ensendio. (B. Garcia, photo courtesy of Zamboanga City Police Office)