Muerto el un informante del pulisiya myentras irido su compañero na un incidente de puñalada na Barangay Tugbungan aqui na ciudad de Zamboanga.
Asegun con Police Major Sonny Boy Perez, el hefe del Zamboanga City Police Station 6 (ZCPS6), cay el incidente ya ocuri mga alas 7:25 del noche del Domingo na Sitio Placer, Barangay Tugbungan, este ciudad.
Asegun con Perez con el muerto victima ya conose como si Jonard Alamillo, 40 años el edad, un informante del pulisiya local.
Con el irido victima ya conose como si Gilbert Palemariano, 38 años de edad, quien admitido ahora na ospital.
Base na investigacion, asegun con Perez, cay antes del incidente, ya teleponia y cumbida si Alamillo con Palemariano para acompanya conele na un “buy-bust operation.”
Asegun cay cuando ya llega si Palemariano na lugar de Alamillo, derepente lang ya abuya el suspechao, si Moises Gonzales, y ya lansia con Palemariano.
Si Palemariano, maskin irido ya ele, ya puede pa istindi.
Asegun con Perez cay si Gonzales ya bira su atencion con Alamillo despues que ya puede escapa si Palemariano.
Ya ase apas y ya lansia si Gonzales con Alamillo por muchas veses que ya resulta na muerte del victima.
Asegun con Perez, con Gonzales ya puede aresta el mga pulis quien ya responde con el incidente myentras pa escapada ya el suspechao.
Si Perez ya habla cay el motivo del incidente relatao na campanya contra droga ilegal.
El puñal y si Gonzales bajo ahora na custodiya del ZCPS6. (B. Garcia, photo courtesy of ZCPS 6)