Ya asegura el Joint Task Force (JTF)-Orion cay preparao ya de ila tropa para rendi deber de seguridad electoral na mga provincias de Basilan, Sulu, y Tawi-Tawi, asegun con el 4th Civil Relation Group (4CRG) del Miercoles.
Asegun con el 4CRG, ese el aseguramiento que ya hace si Brigadier General Leonardo Peña, el comandante del JTF-Orion, cuando ya atende le del Martes na Sulu con el Voters Demo of Automated Counting Machine (ACM) que ya conduci el comision de elecciones o Comelec que ta encabesa el Abogao George Erwin Garcia.
Ya habla pa si Peña, hay continua sila mejora de ila preparaciones de seguridad para el eleccion que esperansao conduci na 2025.
Si Garcia y otro mga oficiales ya anda del Martes na Area Coordinating Center (ACC) na Patikul, Sulu y ya demostra el operacionalizacion del ACM para asegura su capacidad de servicio, asegurando cada uno y todo componentes ta funciona apropiadamente.
Mientras tanto, ya enfatiza si Peña el importancia del demostracion del ACM como parte del preparacion para del venedero eleccion.
El mga votantes de Sulu, hay vota tamen mga oficiales del parlamento na region autonomo puera que hay vota sila mga oficiales local y nacional durante el eleccion na otro año.
El eleccion de parlamento na otro año amo el primera vez que hay conduci na Bangsamoro Autonomous Region in Muslim Mindanao. (B. Garcia)