El gobierno del ciudad de Isabela na provincia de Basilan ya inagura del Sabado con el P12.9 millones proyecto de dos andanas Halal Meat and Dried Seafood Section na mercado publico del ciudad.
El Alcalde Sitti Djalia Turabin-Hataman, quien ya encabesa con el inaguracion, ya habla el facilidad ta simboliza el esfuerzos incansables del gobierno local para moderniza el facilidades na mercado y suporta con el desarollo del economico local.
El facilidad tiene el caracteristicas de 24 mesa, con 12 mesa cada piso, deseñao estrategico para acomoda con mga venteros y proporciona bastante espacio para el exhibicion y venta del carne halal y mariscos secos, asegun con Hataman.
Asegun con Hataman, el iniciativa hinde lang ta solva con el demanda creciente para del productos certificados halal pero ta suporta tambien con el busca lavida del mga venteros local y promueve adhesion de practicas culturales y religiosas.
Con el inaguracion del proyecto ta atende si Mujiv Hataman, el congresista del provnicia del Basilan, Concejal Bimbo Epping, Bario Capitan Jaider Jundam del Kaumpurnah Zone 1, Ingeniero del Ciudad Reynaldo Dagohoy, y Oficial de Servicios Generales del Ciudad Eugene Strong.
Mientras tanto, el Alcalde Hataman hunto con el Congresista Hataman ya inspecciona con el Mercado Publico del Ciudad de Isabela para chekia con el administracion para este temporada de vacanciones.
El inspeccion ya conduci despues del inaguracion del dos andanas halal meat and dried seafood section na seccion de mercado humedo. (B. Garcia)