Bajo ahora na curada medical el un agila (serpent eagle) na Regional Wildlife Rescue Center del Departamento de Media-ambientes y Recursos Naturales (DENR) na Barangay Baclay, Tukuran, Zamboanga del Sur.
Asegun con Rosevirico Tan, el portavoz del oficina rehyonal del DENR, cay con el agila recientamente ya salva con irida na lao isquierda ojos na Barangay Datagan, municipio de Guipos, provincia del Zamboanga del Sur.
Asegun con Tan cay con el irido agila ya entrega si Ernesto Cadelanza, Jr. con el mga myembros del “wildlife team” del Community Environment and Natural Resources Office (CENRO)-Guipos.
Si Cadelanza ya informa con el wildlife team cay ya salva le con el agila desde mga buyug que ya ataka con el pajaro.
Si Forest Technician Jaylyn Bagacay del wildlife team ya habla cay el agila tiene el anchor del alas de 43.31 pulgada y tiene el pesades de 250 gramos.
Con el agila ya lleva na Regional Wildlife Rescue Center del DENR na Tukuran, Zamboanga del Sur, para el propio observacion y medicacion antes ay larga con el pajaro na monte.
Myentrastanto, el DENR ta continua apela con el publico para no cuji mga pajaro y reporta na agencia si tiene sila na posesion mga “wildlife species”. (B. Garcia) (Photo Courtesy of CENRO-Guipos)