Un persona mas buscada quien na mismo tiempo conosido como un infamoso criminal el ya muri na un tirahan contra con mga autoridad na provincia del Zamboanga del Sur, asegun con el policia del Sabado.
Asegun con el mando regional del policia, el tirahan ya ocuri mga alas 12:45 del Jueves aga na Purok Mauswagon, Barangay Poblacion, Labangan, Zamboanga del Sur.
El mando regional del policia nohay nombra con el muerto infamoso criminal puera lang de habla’r listao ele como el numero seis persona mas buscada na region.
Asegun con el policia, el tirahan ya ocuri despues que el infamoso criminal, usando calibre .45 pistola, ya tira cuando ya gole ele el llegada del mga pulis na su kuta.
Durante el tirahan, asegun con el policia, ya tupa bala con el infamoso criminal y enseguidas conele ya lleva na hospital, pero por mal suerte, ya declara conele muerto cuando ya llega na facilidad medical.
El policia ya habla, el defunto infamoso criminal tiene pendiente orden de aresto por el crimen de multiple probao matansa y destroso de propiedad con recomendao piansa de P120,000. El orden de aresto estaba na un corte na ciudad de Pagadian.
Asegun con el policia, tiene pa ele otro orden de aresto por el crimen de ilegal posesion de armas de fuego con recomendao piansa de P60,000 que ya dale el un corte del ciudad de Pagadian.
Asegun con el policia, el defunto infamoso criminal envuelto na mas reciente incidente de tiroteo na municipio del Labangan, Zamboanga del Sur.
El policia ya habla, el infamoso criminal envuelto tamen na mga actividades de droga ilegal. (B. Garcia)