El mga otoridad ya aresta con tres personas y ya confisca mas de P1.3 milyones cantidad droga ilegal y pusil na un campanya contra droga na Maguindanao del Norte, el pulisiya ta anuncia del Domingo.
Si Police Brigadier General Allan Nobleza, el director del pulisiya na Bangsamoro Autonomous Region in Muslim Mindanao (BARMM) ya nombra con el mga arestao suspechao como canda Saharudin Esmael Abu, Guiamaluden Lumapguid Lidasan, y si Jeresh Baya Villarin, todo mga residentes del Barangay Sarmiento, Parang, Maguindanao del Norte.
Un compañero del mga suspechao conosido como si Binladen Lumapguid Lidasan ya puede escapa.
Asegun con Nobleza con el mga suspechao ya aresta na campanya contra droga ilegal mga alas 5:30 del Martes tarde na Purok Ambo, Barangay Sarmiento, Parang, Maguindanao del Norte.
Asegun con Nobleza ya puede confisca na posesion del mga suspechao 203 gramos de suspechao shabu que tiene el valor de P1,380,400, un calibre .22 revolver con mga bala, y diferentes accesorias na uso de droga ilegal.
Si Nobleza ya habla cay ya detene con el mga suspechao pendiente el plantada del formal asunto encontra canila na jusgado.
Ya comenda si Nobleza con mga pulis por el de ila dedicacion na trabajo para eradica con el bendida y uso de droga ilegal na rehyon otonomo. (B. Garcia, photo courtesy of Police Regional Office-Bangsamoro Autonomous Region)