El Oficina del Presidential Adviser on Peace, Reconciliation and Unity (OPAPRU) ya extende ayuda financial con el siete soldao quien ya iri na reciente incidente de emboscada (ambush) na provincia del Basilan.
Con el ayuda financial desde’l OPAPRU ya entrega si Brigadier General Alvin Luzon, comandante del 101st Infantry Brigade, cuando ya visita le con el siete soldao del otro dia na ospital.
Nohay mas menciona si Luzon si cuanto ayuda financial ya recivi desde’l OPAPRU cada uno del siete soldao quien ta recubri este tiempo na un ospital.
El siete soldao, quien mga personajes del 64th Infantry Battalion, ya iri durante el incidente de emboscada del Agosto 12 na Barangay Ulitan, Ungkaya Pukan, Basilan.
Un soldao y un pulis el ya muri durante el incidente de emboscada na Barangay Utlitan.
El mga soldao y pulis ta acompanya con el Vice Alcalde Ahmadin Barahim del Ungkaya Pukan y con mga myembros del “Joint Peace and Security Team” cuando ya man ripika de tiro canila el 10 ‘rouge” myembros del Moro Islamic Liberation Front (MILF).
Durante el incidente, el grupo del Barahim ta conduci inspeccion na Barangay Ulitan en preparacion para el conducida de un programa de “civic action”.
Dos del 10 suspechao na emboscada ya rindi con Luzon del Agosto 15 na quartel del 101st Infantry Brigade na Campo Luis Biel II na Barangay Tabiawan, ciudad de Isabela, el cabesera del Basilan.
Con el JPST ya creya como parte del “2014 Comprehensive Agreement on the Bangsamoro” entre el govierno del Pilipinas y MILF.
El mandato del JPST amo para supervisa con el proceso de paz y securidad del Mindanao.
Ya establisa con el JPST como parte del proceso de decomision del mga activo combatientes (combatants) del MILF. (B. Garcia) (Photo Courtesy of Ronda del Basilan)
