El gobierno local, por medio del “City Peace and Order Council (CPOC)”, ya principia ya conduci este dia de Lunes, Enero 22, el reentrenamiento del mga miembros del “Barangay Intelligence Network (BIN)” desde 98 barrios aqui na ciudad.
El decision para el conducida del reentrenamiento del mga miembros del BIN ya ase durante el junta del CPOC para el primer cuarto de este año del otro semana.
Asegun con Jun Cillo del oficina del ciudad del Departamento del Interior y Gobierno Local, el capacitacion ay conduci en cinco grupos principiando este dia de Lunes hasta amediante del mes de Febrero este año.
El oficina de Cillo amo ta servi como el secretaria del CPOC, que ta encabesa el Alcalde John Dalipe.
Asegun con Cillo, cada uno del 98 barangays del ciudad, hay imbia cinco miembros de BIN para participa na reentrenamiento, quien ay enseña con el de ila mga compañeros na de ila respetivo comunidad.
El reentrenamiento del mga miembros del BIN hay cubri mga lecturas aserca de inteligencia basico, operaciones de patrulla, manejada de trafico, desastre y alivio, operaciones de rescate y otros cosas pa.
Asegun con Dalipe, tiene el necesidad para mejora el habilidades y ase con el mga miembros del BIN efectivo y eficiente como multiplicadores de fuerzas de seguridad na de ila respetivo comunidad. (B. Garcia, photo courtesy of City Hall PIO)