El gobierno local bajo’l liderato del Alcalde John Dalipe ya distribui ayuda del Lunes tarde con el mga familiares afectao na incendio na Calle Claro, Barangay Camino Nuevo, ciudad de Zamboanga.
Si Dalipe, hunto con Consejal Carol Julianne Dalipe, el presidente del federacion del Sangguniang Kabataan, ya distribui mga articulos de socorro que ya inclui paquetes de comida familiar, caliente comida, petate, manta, tents, y balde con agua.
El Oficina de Bienestar y Desarollo Social del Ciudad o CSWDO ya reporta cay 65 familiares con 254 individuales el ya desplaza na incendio que ya ocuri del Lunes aga.
Asegun con el CSWDO, total de 65 casa el ya afecta na incendio que ya comensa mga alas 8:42 del Lunes aga na Calle Claro, Barangay Camino Nuevo, ciudad del Zamboanga.
Na total de 65 afectao casa, 62 el ya man uput na incendio mientras tres el parcialmente ya destrosa.
Asegun con el Zamboanga City Fire District (ZCFD), ya puede controla con el incendio, que ya alcansa na terser alarma, mga alas 9:18 del aga y completamente ya puede apaga mga alas 11:09 del aga.
El ZCFD ya estima con el destroso de propiedad que ya causa el incendio na P350,000.
Asegun con el ZCFD, ta determina pa sila si cosa el causa el incendio. (B. Garcia)