El Armor Division del Philippine Army ya inicia cambio na liderato del 5th Mechanized Infantry Battalion (5MIB) base na provincia del Lanao del Norte, asegun con el militar del Martes.
Asegun con el 4th Civil Relations Group (4CRG), con Tiniente Coronel Neil Piad ya instola como el nuevo comandante del 5MIB y ya releva le con Tiniente Coronel Juvegleen Escandor.
El ceremonia del cambio del mando ya encabesa si Major General Pedro Balisi, comandante del Armor Division y ya hace na quartel del 5MIB del Sabado na Barangay Claro M. Recto, Maigo, Lanao del Norte.
Na su mensaje de despedida, si Escandor ya comenda con el tropas del 5MIB por el de ila habilidad, dedicacion, y loyalidad, expresando profunda gratitud por el confiansa, suporta, y camaraderia que ya tene durante su dos años termino.
Ya expresa tamen si Escandor su apreciacion con el gobierno local y partes interesadas del Lanao del Norte, de quien firme suporta significalmente ya contribui na victoria de batallon.
Na parte de Piad, ya promete le para defende con el practicas de exelencia y estrategias que na lugar ya.
Ya expresa si Piad si entuciasmo para colabora con mga compañeros del mando para el paz y desarollo na de ila jurisdiccion.
Si Balisi, na su mensaje, ya enfatiza el crucial papel del fuerte liderato na mantenida del preparacion y eficacio na unidad.
Si Balisi ya alaba con Escandor por su exemplario servicio, que ya permiti con el 5MIB para hace avances significante para compli el mision y servi con el comunidad.
Ya expresa tamen confidencia si Balisi con Piad cay hay continua le el trabajo con dedicacion del su predecesor, guiando con el batallon para un mayor exito na promocion de paz y desarollo na Lanao del Norte. (B. Garcia)