El gobierno del ciudad de Zamboanga ya extende ayuda con el mga victimas del tifun Kristine na region del Bicol.
Asegun con el Alcalde John Dalipe, el ayuda ta consisti de 8,000 bidon ta contene sinco galon de agua potable cada uno y 10,000 paquete del medicina para ayuda previni enfermedade de leptospirosis.
Asegun con Dalipe, con el mga bidon de agua y medicina ya hace embarca del Jueves na un barco del fuerza naval na pantalan de Majini na Barangay Calarian para transporta na region de Bicol.
Si Dalipe ya habla, con el donacion ya hace pasa por medio del Oficina del Defensa Civil na region, que hay imbia tamen mga enpaquetao comida para con el mga victimas de tifun.
Asegun con Dalipe, el gobierno del ciudad de Zamboanga ta simpatiza conel mga victimas de tifun Kristine y ya promete le para suporta na de ila esfuerzos de recubrida y construccion de resiliencia. (B. Garcia)