El gobierno local ya compra seis tractora con el valor de P19.2 millones para aumenta con el produccion agricultural del ciudad.
El Alcalde John Dalipe ya encabesa con el entrego del mga nuevo comprao tractora para na oficina de agricultor del ciudad que hay administra con el uso del mga makinaria de kaingin.
“El compre de este mga tractoras es parte del de amon programa para mecaniza con el agricultura local,” si Dalipe ya habla na un entrevista.
Con el mga tractora ya compra por medio del presupuesto del 2024 para na agricultura.
Si Arben Magdugo, el agricultor del ciudad, ya habla con el seis tractoras hay designa na seis distrito agricultural del ciudad.
El seis distrito agricultural que ta cubri con el 98 barrios del ciudad amo el Ayala, Tumaga, Culianan, Manicahan, Curuan, y Vitali.
Asegun con Magdugo, cada distrito ahora tiene ya dos tractoras siguiendo el compre del nuevo seis tractoras.
Si Magdugo ya habla, el mga siembrador quien quiere usa con el tractora tiene que paga P1,800 cada hectaria como el cosa estipulao na existente ordenanza del ciudad.
Ademas, ya habla si Magdugo debe tamen compra el siembrador 40 litros de crudo que necesita para ara un hectaria de kaingin.
Asegun con Magdugo, con el tractora hay maneja el operadores que ya empleya el Oficina del Agricultura del ciudad. (B. Garcia)