Dos gentes el ya muri, uno el irido, y otro uno nohay pasa nada na un accidente vehicular na costa este del ciudad de Zamboanga, asegun con el policia del Lunes.
Asegun con el policia, el accidente ya ocuri mga alas 9:20 del Domingo denoche na carretera del Maria Clara Lorenzo Lobregat na Barangay Manicahan, 20.10 kilometros este del ciudad de Zamboanga.
El policia ya identifica con el dis fatalidad como si Ricky Mangila, 40 años el edad, y si Niel Miguel Marcos, 50 años el edad.
Asegun con el policia, el ya iri amo el nueve años anak hombre de Mangila, quien admitido na hospital.
Asegun con el policia, base na investigacion cay ambos si Marcos y Mangila ta maneja motorciclos para na direccion del Barangay Sangali.
Asegun con el policia, ya man baliscat el dos motorciclos cuando ya man chagis el dos vehiculos.
El policia ya habla, si Mangila ya muri na lugar del accidente cay ya pasa conele encima el un vehiculo que ta maneja si Zhihao Ye, 19, y ta navega pa encuentro con el dos motor.
El policia ya habla, con Marcos y nueve años anak hombre de Mangila ya lleva na hospital, pero ya despidi si Marcos mientras bajo curada medical.
Asegun con el policia, nohay pasa nada con Ye durante el accidente. (B. Garcia)