El gobierno del ciudad de Zamboanga ya aloca P8.9 millones fondo para el participacion del ciudad na Batang Pinoy National Championship 2024 na Palawan.
Asegun con el Alcalde John Dalipe, el alocacion de P8.9 millones hay usa para el gastos na viaje del mga atletas del ciudad, y uniforme del delegacion, incluido sapatos goma.
Asegun con Dalipe, cada uno del mga atletas del ciudad hay recivi tamen P7,500 prestacion o allowance.
El Batang Pinoy National Championships 2024 hay conduci na Noviembre 23 hasta Noviembre 28 na ciudad de Puerto Princesa, Palawan.
Si Dalipe hunto con Dr. Cecil Atilano, el director del oficina de deportes del ciudad, personalmente ya encabesa con el ceremonia de despedida para del 133 atletas y 33 treinadores del Domingo aga na Joaquin F. Enriquez Memorial Sports Complex (JFEMSC) na Barangay Baliwasan.
Si Dalipe ya anima con el mga atletas para aspira para el grandeza deportiva, y ya reitera su dedicacion na deportes y programas de desarollo del mga jovenes.
El Batang Pinoy o Philippine Youth Games amo el deportes nacional del Filipinas para mga atletas menos de 15 años incluido aquellos hinde ta entra escuela. (B. Garcia)Â