Dos personas clasificao como mga individuales de alto valor, o HVI, el ya aresta y valor de P680,000 droga ilegal el ya confisca el mga autoridad na un operacion contra droga na ciudad de Zamboanga, asegun con el policia del Lunes.
Si Police Brigadier General Bowenn Joey Masauding, el director del mando regional del policia, nohay nombra con el mga arestao suspechao quien un 38 años conductor de jeep y 35 años vendedora.
Asegun con Masauding, con el dos HVI suspechao ya aresta na un operacion de compra busto mga alas 2 de Domingo aga na un motel na Barangay Canelar, ciudad de Zamboanga.
Si Masauding ya habla, ya confisca na posesion del dos arestao suspechao 100 gramos de suspechao shabu enpaquetao na dos termosellada transparente plastico sobrecitos que tiene el valor de P680,000.
Asegun Masauding, con el mga arestao suspechao ya detene en preparacion para el plantada del caso contra canila por violacion del Ley Integral de Drogas Peligrosas de 2002.
Si Masauding ya comenda con el mga operativas de Zamboanga City Police Office y Philippine Drug Enforcement Agency por el exitoso operacion de compra busto que ya resulta na aresto del dos HVI suspechao. (B. Garcia)