El Gobernador Hadjiman Hataman-Salliman del provincia de Basilan ya comenda y expresa su profundo gratitud con el fuerzas de seguridad por el pacifico observacion del Semana Santa del mga fiel Catolico na provincia.
Si Salliman ya hace el comendacion despues que nohay ni un incidente de crimen el ya registra durante el Semana Santa que ya principia del Domingo Ramos, Marso 24, y ya culmina del Domingo Encuentro, Marso 31.
Mientras tanto, ya apela si Salliman ambos con el policia y militar para continua con el intensificao medidas de seguridad na Basilan cay el mga Muslim ta observa pa con el mes de Ramadan.
El mes de Ramadan esperansao termina na segundo semana del mes de Abril, el tiempo el mga Muslim ay celebra con el Hariraya.
El provincia de Basilan ta esta pacifico desde’l principio del mes de Ramadan, y si Salliman ta esperansa cay el situacion ay esta pacifico hasta na fin del mes de puasa y despues.
Si Salliman ya apela con el mga Basileños—Muslims, Christianos y Lumad—para esta vigilante y coopera con el mga autoridad na mantencion del paz y orden na provincia. (B. Garcia)