Ya implementa cambio na liderato del barko, el BRP-Bacolod (LS550), uno del maga varco ta sirvi na jurisdiccion del Fuersa Naval na Western Mindanao.
Con Commander Ronald Keith Tañedo ya instola como el nuevo comandante del LS550 na un ceremonya de cambio del mando del Lunes que ya ase alli na Naval Station Romulo Espaldon, este ciudad.
Si Tañedo ya releva con Commander Freddie Parparan, con quien ya dale otro designacion.
Si Capitan Dwight Steven Dulnoan, el deputy commander for fleet operations del Fuersa Naval na Weste Mindanao, amo el quien ya encabesa con el ceremonya de cambio del mando para el liderato del LS550 por parte de Rear Admiral Donn Anthony Miraflor, el comandante del Fuesa Naval na Weste Mindanao.
Durante el ceremonya, Si Dulnoan ya dale Medalya de Merito Militar con Parparan por su invaluable servicio y contribucion que ya resulta na buen acomplisimiento como suporta con el mando del Fuersa Naval na Weste Mindanao.
Si Dulnoan, por parte de Miraflor, contodo corazon tamen ya expresa gratitud y ya comenda con Parparan por el exelencia na su trabajo durante si turno como el comandante del LS550.
El LS550 amo el solamente clase de barko el designao bajo el Fuersa Naval na Weste Mindanao que tiene el capabilidad para transporta tropa y maga equipajes del maga soldao del Western Mindanao Command. (B. Garcia, photo courtesy of Naval Forces Western Mindanao)