31.9 C
Manila
Thursday, March 28, 2024

Zamboanga: Fuersa naval, Buro de Aduana ya confisca seis punto seis milyones smuggled cigarillo na Sulu

- Advertisement -

El personajes del fuersa naval del Western Mindanao hunto con maga operativa del Buro de Aduana ya aresta sinco personas y confisca seis punto seis milyones de pesos smuggled cigarillo del ayer aga na mar del provincia de Sulu.

Si Rear Admiral Toribio Adaci, Hijo, comandante del fuersa naval del Western Mindanao, ya nombra con el sinco arestao personas como canda Monal Haili, Asmad Tingkahan, Latas Ismael, Bardi Ukkang, and Alsi Tingkahan.

Asegun con Adaci, cay ya precura pa era escapa el maga suspechao cuando ya columbra sila con maga otoridad, pero ya alcansa canila maga alas tres cuarenta del ayer aga na vicinidad de dos milia nautical este parte del isla de Balod, alla na provincia del Sulu.

Durante el inspeccion y inventaryo, el jungkong donde muntao el sinco arestao suspechao ta contene siento ochenta’y dos cahon de smuggled cigarillo que tiene el valor de seis punto seis milyones de pesos.

Con el aresta sinco personas, el de ila jungkong y cigarillo, ya lleva el para na pantalan del majini del Naval Station Romulo Espaldon aqui na ciudad de Zamboanga.

Asegun con Adaci cay ya invita sila con Philippine Drug Enforcement Agency para inspecciona con el maga cigarillo si tiene mesklao droga ilegal, pero negativo el resulta.

Con el maga suspechao, smuggled cigarillo y jungkong ya entraga na custodiya del Buro de Aduana para el propio disposision. (Bong Garcia) (Photo Courtesy Naval Forces Western Mindanao)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -