Ya aresta con un fescador mga pulis na un campanya contra droga ilegal aqui na ciudad de Zamboanga.
Si Police Major Ramon Aquiatan, Jr., el hefe del Zamboanga City Police Station 10 (ZCPS10), ya nombra con el arestao fescador como si Jomar Butlangan, 43 años el edad.
Asegun con Aquiatan cay con Butlangan ya aresta na un “buy-bust operation” mga alas 1:44 Martes aga na Purok 3, Barangay Patalon, este ciudad.
El buy-bust operation contra con Butlangan ya implementa el mga operativas de pulisiya siguiendo el bisiada na su mal actividad.
Asegun con Aquiatan cay mga operativas ya puede confisca na posesion de Butlangan valor de P6,256 suspechao shabu y dos pedaso de P100 markao sen.
Si Aquiatan ya habla cay detenido si Butlangan na quartel del ZCPS10 en preparacion para el plantada del formal asunto encontra conele. (B. Garcia) (Photo Courtesy of ZCPS10)
