Total de 1,099 estudiantes de segundarya, compuesto del segundo grupo de beneficiaryo del “Summer Program for the Employment of Students (SPES)” el ya principia trabaja na govierno local siguiendo el orientacion que ya encabesa el Alcalde John Dalipe del Lunes, Hulyo 17.
Na su mensaje, si Dalipe ya apela con el mga beneficiaryo del programa para trabaja con dedicacion y toma ventaja con el oportunidad ya dale canila para na govierno local dentro de 20 dias por medio del SPES.
El administracion de Dalipe ya aloca P20 milyones para el implementacion del SPES este año con el suma total de 2,321 posision de trabajo.
Con el programa ta implementa el govierno local y el Departamento de Obras y Empleyo con 60 porciento y 40 porciente apropracion, respetivamente.
El primer grupo de beneficiaryo, compuesto de 1,222 estudiantes del colegio, ya trabaja desde Hunyo 19 hasta Hulyo 14.
Bajo el programa, cada un estudiante ay recivi el total suweldo de P11,379 para el periodo de 20 dias trabajo o P568.95 suweldo cada dia. (B. Garcia) (Photo Courtesy of City Hall PIO)