Ya muri el un suspechao carnaper na tirahan contra con mga pulis na ciudad de Pagadian, Zamboanga del Sur.
Si Police Colonel Diomarie Albarico, el director del pulisiya na provincia del Zamboanga del Sur, ya nombra con el muerto suspechao carnaper como si Ramnel Mucaram base na documento ya recubri na posesion del suspechao.
Asegun con Albarico cay el tirahan ya ocuri mga alas 2 del aga del Domingo na Barangay Muricay, ciudad del Pagadian.
Asegun con Albarico cay ya ocuri el tirahan cuando el suspechao ya ase para y abaja su motorsiclo y despues hala su pusil y ya tira por cuantos beses con el mga pulis, quien akel tiempo ta ase apas con el suspechao.
Antes el tirahan, asegun con Albarico cay el mga personajes del pulisiya ya ase enbuscada con el suspechao despues que ya recivi sila un reclamo de “carnapping”.
Si Albarico ya habla cay enseguidas ya lleba con el suspechao na hospital, pero ya declara con ele muerto el doctor.
Ya puede recubri mga pulis na lugar del tirahan un calibre .45 pistola, sinco capsula del semahante pusil, dos capsula de .9-mm, un bag ta contene sen, un cellphone y ID de PhilHealth con el nombre de Ramel Mucaram.
Con el resto del suspechao ya entrega na un funerarya na ciuad de Pagadian. (B. Garcia)