Un estudiante de Junior High School el ya muri na un incidente de tiroteo na provincia del Basilan, asegun con el policia del Viernes.
Asegun con el policia, el incidente ya ocuri na estacionamiento del mini gimnasio na municipio de Tipo-Tipo, Basilan.
El policia ya identifica con el victima como si Fadzrie Ismail, un residente de Barangay Kuhun na municipio del Al-Barka, Basilan.
Base na investigacion del policia, si Ismail parao na estacionamiento del mini gimnasio cuando ya tira conele sin provocacion el un desconocido armao persona quien derepente ya llega abordo na un motorciclo.
El victima ya muri na lugar del incidente mientras el suspechao enseguidas ya escapa.
El policia na municipio de Tipo-Tipo ta continua investiga con el incidente para determina el motivo y identifica con el suspechao.
Asegun con Police Colonel John Cundo, el diputado director del policia na Basilan, si Ismail para gradua era na Junior High School este dia de Viernes.
Mientras tanto, el Alcalde Arcam Istarul ya ordena con el mga autoridad para acelera el investigacion y lleva con el suspechao na justicia. (B. Garcia)