El govierno del Australia ya reitera el promesa de extender ayuda con el fuersa armada del Pilipinas, particularmente con el Western Mindanao Command (Westmincom), na peleya contra terorismo.
Ese el mensaje del Excelencia Hae Kyong Yu, el embajadora del Australia para na Pilipinas, cuando ya visita na quartel del Westmincom na Campo Navarro aqui na ciudad del Lunes.
Ya promete si Yu para suporta con el esfuersos colaborativos del fuersa armada del Pilipinas y del Office of the Presidential Adviser for Peace, Reconciliation, and Unity (OPAPRU).
Durante el visitada de Yu, ya acompaña conele el Secretario Ajunto (Assistant Secretary) Andres Aguinaldo, Jr., y si Ariel Hernandez del OPAPRU.
Si Major General Ignatius Patrimonio, el comandante del Joint Task Force Orion, ya expresa su sincero gratitud con el mga distinguidos visitas por el de ila continuando suporta na campaña del Westmincom contra terorismo y violente extremismo.
Ya man hunto con Patrimonio el otro mga altos funcionarios del Westmincom cuando ya recivi le con el mga distinguidos visitas na Campo Navarro del Lunes. (B. Garcia, photo courtesy of Westmincom PIO)