Un lider del Dawlah Islamiya (DI) el ya muri mientras un persona el ya aresta mga autoridad siguiendo el tirahan na un lubrigo lugar na provincia del Lanao del Sur, asegun con el militar.
Asegun con el Western Mindanao Command (Westmincom), con el lider del DI quien ya muri ya conose como si Alandoni Macadaya Lucsadatu, un sublider del DI-Maute Group (DI-MG).
Asegun con el Westmincom, si Lucsadatu ya muri na un tirahan que ya socede na Barangay Tambo, Piagapo, Lanao del Sur del Domingo aga.
El arestao persona ya conose como si Saadia Dato Angni, el tiya de Lucsadatu.
El Westmincom ya habla, ya ocuri el tirahan cuando el mga tropas del 3rd Scout Ranger Battalion and 51st Infantry Battalion ya dale encuentro con sinco mga miembros del DI-MG mientras ta conduci sila ofensiva na Barangay Tambo municipio de Piagapo.
El Westmincom ya habla cay si Lucsadatu un residente del Barangay Old Poblacion, Munai, Lanao del Norte y uno del mga restante sublider del DI-MG base na borde del provincias de Lanao del Norte y Lanao del Sur.
Si Lucsadatu ta saca con su mga parientes na municipio del Munai para queda miembros del DI-MG.
Mientras tanto, si Tiniente General William Gonzales, el comandante del Westmincom, ya comenda con el mga tropa del Joint Task Force ZamPeLan por el de ila buen acomplisimiento. (B. Garcia, photo courtesy of Westmincom)