Tiene ya el total de 8,049 aplicaciones de registracion y renovacion de permisos de negocios el ya evalua ya el durante el primer 14 dias de implementacion del electronic Business-One-Stop-Shop (eBOSS).
Asegun con Benjie Barredo, el jefe del Oficina de Permisos y Licensias Comerciales, el numero de aplicaciones de registracion y renovacion ya evalua sila este año bien alto comparando con el del otro año que ya alcansa lang el total de 4,450.
Asegun con Barredo, ya nota sila cay tiene significante mejoramiento na proceso de registracion y renovacion desde ya prinicipia implementa con el eBOSS del Enero 2 en liña con el cumplimiento del ciudad con el Facilidad para Hacer Negocios en Derecho, o el como se llama Ease of Doing Business Law.
Si Barredo ya habla, cay desde Martes, ya alcansa ya na total de 8,212 el numero de aplicaciones de permiso de negocio ya recivi su oficina.
Asegun con Barredo, 8,049 del total aplicaciones el ya evalua ya sila con 4,049 evaluao aplicaciones el ya paga ya el necesarios pago.
Si Barredo ya habla, tiene tamen 4,040 aplicaciones del permisos de negocio el ta espera para paga.
Asegun con Barredo, por causa de este desarollo, ta hace sila de lijero el proceso del registracion y renovacion del permisos de negocio. (B. Garcia)