El mga autoridad ya aresta con dos individuales de alto valor, o high-value individuals (HVIs) y ya confisca P3.4 millones valor de droga ilegal na provincia del Lanao del Sur, asegun con el Philippine Drug Enforcement Agency (PDEA) del Miercoles.
El PDEA na Bangsamoro Autonomous Region in Muslim Mindanao (BARMM) ya nombra con el dos arestao suspechao como canda alias Papad y alias Andina, ambos sila mga residentes del Barangay Mindalano, ciudad del El Salvador, Lanao del Norte.
Asegun con el PDEA-BARMM, con Papad y Andina ya aresta na un operacion de compra busto mga alas 12:30 del Martes tarde na Barangay Poblacion, Saguiaran, Lanao del Sur.
Asegun con el PDEA-BARMM, ya confisca na posesion de canda Papad y Andina 500 gramos de suspechao shabu que tiene el valor de P3.4 millones, un celpon, un motorciclo, dinero de compra busto, y bolso bandolera ta contene tarjetas de identificacion.
El PDEA-BARMM ya habla, el mga arestao suspechao envuelto na bendida de droga ilegal na mga sercanos municipios del Lanao del Sur y ciudad de Marawi.
El PDEA-BARMM ya detene con el dos arestao suspechao en preparacion para el plantada del asunto contra canila por violacion del Ley Integral de Drogas Peligrosas del 2002.
El mga operativas del PDEA-BARMM ya conduci el operacion de compra busto con el suporta del 45th
Special Action Company del 4th Special Action Battalion del PNP Special Action Force. (B. Garcia)