El Department of Social Welfare and Development (DSWD) ta ase un proyecto de instolacion de luzes solar na uno del mga barangay na municipio de Kalawit na provincial del Zamboanga del Norte.
El implementacion del proyecto ta ase por medio del Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS), un programa de alivio de la probreza del govierno nacional que ta implementa el DSWD.
Asegun con el oficina rehyonal del DSWD cay el beneficiaryo del proyecto amo el Barangay Paraiso na municipio de Kalawit.
Asegun con el DSWD cay el proyecto esperansao complete na fin de este mes de Agosto.
El proyecto tiene el total valor de P436,224.84, con fondos de contrapartida de P160,000 desde’ Barangay Paraiso y P5,500 desde’l govierno municipal.
Asegun con Alcalde Salvador Antojado de municipio de Kalawit cay el momento ay completa el proyecto, hinde na tene miedo mga residentes del Barangay Paraiso camina denoche cay claro ya el camino por causa na instolacion del mga luzes solar.
Si Antojado ya rindi gracias con el DSWD por el implementacion del mga proyecto de Kalahi-CIDSS na su municipio. (B. Garcia, photo courtesy of DSWD-9)
