Seis myembros del Bangsamoro Islamic Freedom Fighters (BIFF) el ya rindi na otoridad na provincia del Norte Cotabato amediante el ofensiva encontra canila.
El Western Mindanao Command (Westmincom) nohay nombra con el seis BIFF quien ya rindi hablando lang cay mga siguidores sila del faccion de Karialan del BIFF.
Asegun con el Westmincom cay tres del seis extremista BIFF ya rindi na quartel del 90th Infantry Battalion na Barangay Ladtingan, Pikit, North Cotabato del Biyernes.
El tres ya entrega dos riple Garand y un calibre .30 riple de sniper con Coronel Neil Alfonso Roldan, el diputado comandante del 602nd Infantry Brigade.
Asegun con el Westmincom cay el otro tres, quien mga siguidores tamen del faccion de Karialian del BIFF, ya rindi con el mga tropa del “Community Support Program-Preventing and Countering Violent Extremism (CSP-PCVE)” na Barangay Kabasalan, Pikit, Norte Cotabato del Biyernes.
Ya entrega sila con mga soldao un riple M14, un riple Garand, y un calibre .45 pistola con mga bala.
Si Roldan ya atribuji el rindida del mga myembros del BIFF na continuando esfuerso del CSP-PCVE del 90IB para busca y convinci con mga restante myembros del group para rindi.
Si Tiñente Heneral Roy Galido, el comandante del Westmincom, ya habla cay el buen implementacion del mga programa es un resulta na colaboracion entre mga soldao, uban agencias, govierno local y otro mga concierne grupo. (B. Garcia, photo courtesy of WestMinCom)