El Departamento de Obras Publicas y Carreteras, o DPWH, ya completa el construccion del P14 millones edeficio de escuela na uno del mga barangay na ciudad de Zamboanga, asegun con el DPWH del Miercoles.
El DPWH-Zamboanga Peninsula ya habla, con el edeficio de escuelas que tiene dos andanas con cuatro cuartos de estudio ya construi na Barangay Tolosa, ciudad de Zamboanga.
Asegun con el DPWH-Zamboanga Peninsula, el nuevo construido edeficio de escuela tiene el total anchor del piso de 218.5 metros cuadrado cada andana con cuatro escusao para del mga estudiantes, maestro y maestra y personas con discapacidades.
El edeficio tiene tamen tanque de agua elevado con tanque cisterna para el segurao ofertada de agua y estacion para laba mano para el propositos de hygiene.
Asegun con el DPWH, cada cuarto de estudio tiene pisarra, ventilador, y 90.20 metros lineal pasada de gente con techo.
“Con alocacion de P14 millones, este proyecto ya prioriza el seguridad, calidad y estandarte para asegura el sostenible ambiente de estudio del mga estudiantes,” el DPWH-Zamboanga Peninsula ya habla na un anuncio.
Asegun con el agencia, con el proyecto ya construi el oficina de ingeniaria del segundo distrito del DPWH na ciudad de Zamboanga. (B. Garcia)