El mga autoridad ya aresta dos gente y ya confisca P7.79 millones valor de contrabando na un operacion de aplicacion de ley na provincia del Zamboanga del Norte, asegun con un alto oficial del policia del Miercoles.
Si Police Brigadier General Roel Rodolfo, el nuevo instolao director del mando regional del policia, o Police Regional Office-9 (PRO-9), nohay identifica con el dos arestao gente puera lang de habla’r ambos sila mga hombres que tiene el edad de 29 y 47.
Asegun con Rodolfo, con el dos gente ya aresta na un operacion de aplicacion de ley impulsado de inteligencia del Martes na Barangay Poblacion, Leon B. Postigo, Zamboanga del Norte.
Asegun con Rodolfo, el mga personajes del Zamboanga del Norte Provincial Intelligence Unit en coordinacion con el policia del Leon B. Postigo ta conduci checkpoint cuando ya coge sila un trak lleno de smuggled cigarillo.
Si Rodolfo ya habla, ya confisca desde con el dos arestao suspechao 136 cajon de diferentes clase de cigarillo sin documento y advertencia de salud grafica que tiene el valor de P7,792,800.
“Este exitoso operacion ta descata el continuando esfuerzos del mando regional del policia para combate con el actividades de ilegal comercio y proteje con el salud del pulico por medio de asegurar cay el mga productos de tabaco ta compli con el existente leyes, incluido del advertencia de salud grafico que
requerimientos bajo el Ley del Republica 10643,” si Rodolfo ya habla na un anuncio.
Si Rodlfo ya apela con el publico para esta vigilante y reporta algun actividades ilegal na mas sercanos oficina del policia para ayuda proteje con el comunidad desde actividades ilegal.
El mga confiscao smuggled cigarillo hay entrega na Buro de Aduana para el propio disposicion. (B. Garcia)