Con dos personas ya aresta el otoridad na separao campanya contra droga ilegal y ya puede pa confisca un armas de fuego aki na ciudad.
Con el mga suspechao ya conose como canda Roel Macaso, treynta’y uno anios y si Susan Azusana, cuarenta anios el edad.
Asegun con el Police Station 7 cay con Macaso ya aresta del Sabado denoche alli na Barangay Cabatangan, este ciudad.
El mga operativa del pulisiya ya puede recubri na posesyon de Macaso suspechao shabu que tiene el valor de treynta’ sinco mil siento cuatro pesos, un calibre treynta’y ocho revolver con bala y P500 marked money.
Asegun con el Police Station 11 cay con Azusana ya aresta del biyernes denoche alli na Barangay Sto. Niño, este ciudad.
Ya puede recubri na posesyon de Azusana suspechao shabu que tiene el cantidad de veinter mil y cuatro sientos pesos.
El dos suspechao detenido ahora pendiente el presentada del formal asunto contra canila.
Myentrastanto, si Daniel Bernas, un barangay tanod del San Jose-Cawa-Cawa, ya entraga na Police Station 11 del Sabado dos grande pakete de Marijuana.
Asegun con Bernas con el mga pakete de Marijuana ya buta el dos desconosido persona del Sabado cuando ya columbra sila con mga oficiales del Barangay San Jose-Cawa-Cawa alli na Babilan Drive del mencionao barrio.
El dos grande pakete de Marijuana enbolbido pa na un plastic de un companiya de correo. (April Boy Regino)