Mga otoridad ya aresta con un suspechao myembro del group Abu Sayyaf y ya confisca mga armas del fuego del Sabado denoche, alli na Barangay Arena Blanco, este ciudad.
El Coronel Felix Martinez, hefe del first Zamboanga City Mobile Force Company, quien ya encabesa con el operacion, ya nombra con el arestao suspechao como si Ban Sali Ubbie alias Ban Mannah, cuarenta’y siete anios el edad y un nativo de Maimbung, Sulu.
Si Martinez ya habla cay con Ubbie ya aresta cuando ya servi sila un orden de aresto mga alas ocho kinse del Sabado denoche alli na Barangay Arena Blanco.
Asegun con Martinez si Ubbie tiene pendiente orden de aresto por el crimen del matansa y three counts Frustrated Murder estaba na corte del Parang, Sulu con el pecha de Hunyo dos, dos mil nueve.
El mga pulis ya puede recubri na casa de Ubbie cuatro armas de fuego compuesto de tres calibre cuarenta’ sinco pistola y un calibre treynta’ ocho revolver y mga bala.
Con Ubbie ya pone bajo el costodiya del Police Station 6 para el propio accion. (April Boy Regino)