Pasada alas jes del aga del ayer petsa veinte sinco en este anyo, el maga personahes del ZCPS9 ya conduci un law enforcement operation na Zone 1, Barangay Maasin, en este ciudad.
El operacion ya resulta na aresto di Custodio Tabañera, sesenta’y tres años de edad por el krimen de Grave Threats con criminal case no. 57257 que ya man issue el Branch 3, 9th Judicial Region na MTCC, en este ciudad.
Na equal dia, voluntariamente ya rendi na Estacion de Polisiya Central si Edison Abdujarak Candaleria, quien asegun tiene pendiente orden de aresto por el violasyon del Section 10 de R.A 7610 o mas conocido com el “Special Protection of Children Against Abuse, Exploitation and Discrimination Act” con recomendao pyansa valor de otsenta mil pesos.
Ademas, durante el Oplan Katok, tres responsable dwenyo del armas fuego el voluntaryamente tambien ya rendi diila maga expired armas de fuego na concierne estacion por el safekeeping y propyo dokumentasyon. (Erica B. Javier)