El publico tiene el oportunidad para compra fresco y barato productos de agricultura y de pescaria incluido mga comida enlatao y otros pa na sinco dias “Kadiwa Pascua Bazaar” aqui na ciudad.
El Kadiwa Pascua Bazaar que ta conduci alli na Calle Rizal o mas conosido como el Petit Barracks, ya principia del Lunes y ay termina na Viernes, Deciembre 8.
Asegun con del Departamento de Agricultura, el vendible producto agricultural na Kadiwa amo el arroz que ta venda lang na precio de P25 kada kilo.
Tiene el total de 38 expositores (exhibitors) compuesto del mga miembros de cooperativas y asosaciones de siembrador, del ciudad de Zamboanga, y del mga sercanos provincias del Zamboanga Sibugay, Zamboanga del Sur y Zamboanga del Norte, el ta participa na sinco dias actividad.
Con El Kadiwa Pascua Bazaar ya organisa el “Agribusiness and Marketing Assistance Division” del Departamento de Agricultura. (B. Garcia) (Photo Courtesy of Department of Agriculture- ZamPen)