Dose mga miembros del grupo Abu Sayyaf el ya rindi na autoridad na provincia del Basilan, asegun con un alto oficial del militar del Miercoles.
Asegun con Brigadier General Alvin Luzon, el comandante del 101st Infantry Brigade, el 12 miembros del grupo Abu Sayyaf ya rindi despues del muerte del de ila lider, si Mundi Sawadjaan.
Si Sawadjaan ya muri na tirahan contra con mga soldao del Sabado, Deciembre 2, na mar amediante del Barangay Banah na municipio del Tipo-Tipo y Barangay Lahi-Lahi na municipio del Tuburan, Basilan.
Si Sawadjaan, quien experto na hacida de bomba, pa salida le na Basilan y para anda na provincial de Sulu cuando ya columbra conele el mga soldao ta conduci patrulla maritima.
Asegun con Luzon, el 12 miembros de grupo Abu Sayyaf ya rindi por medio tamen del esfuerso del Gobernador Jim Hataman-Sallima, mga lideres del Moro Islamic Liberation Front, y del Alcalde Talib Pawaki del municipio de Mohammad Ajul.
Asegun con Luzon, el 12 Abu Sayyaf quien ta rindi, ya entrega mga armas de fuego de alta calibre.
Si Luzon ya presenta canila con Major General Ignatius Patrimonio, el comandante del Joint Task Force Orion, durante un ceremonia na Campo Biel, ciudad de Isabela, Basilan, del Miercoles aga. (B. Garcia) (Photo Courtesy of Basilan PIO)