Un persona el ya aresta por ilegal vendida de fauna silvestre y ya salva dos “Philippine Palm Civets” mga autoridad na un operacion de entrampa na provincia del Misamis Occidental, asegun con el Departamento de Medio Ambiente y Recursos Naturales o DENR.
Asegun con el oficiana regional del DENR, con el suspechao, un 36 años hombre, ya aresta na un operacion de entrampa del otro semana na Barangay La Victoria, La Libertad, Zamboanga del Norte.
El operacion de entrampa ya conduci despues que el mga oficiales del DENR ya ase chequeda con el un anuncio na un pagina de “social media”, el “Dipolog Dapitan Koi Lovers” que ta vende dos Philippine Palm Civets por P10,000.
El mga personajes del DENR na Zamboanga Peninsula immediatamente ya coordina con mga autoridad y con el de contrapartida para salva con el dos Philippine Palm Civets despues que ya sabe sila cay con el dos animal ta esconde na un lugar que ta cay ya bajo na barrio de Malibugaan na municipio de Conception, Misamis Occidental.
Asegun con el oficina regional del DENR, con el salvao dos Philippine Palm Civets ya pone bajo’l custodia del Oficina Comunitaria de Medio Ambiente y Recursos Naturales del ciudad de Oroquieta City para el mas evaluacion y necesario cuidada antes que ay larga canila na de ila habitat natural.
Asegun con el DENR, ay planta sila asunto legal contra con el mga personas quien envuelto na ilegal vendida del dos Philippine Palm Civets.
Prohibido vende con el clase de animal bajo el ley de republica numero 9147 o mas conosido como el “Wildlife Resources Conservation and Protection Act”. (B. Garcia)