Total de 373 residentes el ya beneficia na un mission medical na provincia de Basilan, asegun con el militar del Viernes.
Asegun con el 101st Infantry Brigade, el mission medical ya conduci del Jueves Santo na Barangay Tubigan, Maluso, Basilan.
Na total de 373 beneficiarios, 109 de ila el ya recivi libre consultacion medical, 99 libre arancada de diente, 110 libre chequida de ojos, y 55 libre examen de glucemia.
Durante el mission medical, ya conduci tamen libre cortada de pelo, ya dale libre medicina, consejada, curacion por oracion (prayer healing) y mga juegos de alegria para del mga bata.
El actividad ya ase posible por medio de esfuerzo colaborativo del “Basilan Alliance Ambassadors for Christ, Zone 1 Alliance Churches” del CAMACOP, mga privado doctor y individual, 64th Infantry Battalion, 101st Infantry Brigade, 3rd Company of 15th Civil-Military Operations Battalion, y el activo participacion del mga residentes del Barangay Tubigan que ta encabesa si Ariel Laping, el barrio capitan.
Na su mensaje, si Brigadier General Alvin Luzon, el comandante del 101st Infantry Brigade, ya expresa su sincero gratitud con el “Basilan Medical Ambassador for Christ with Zone 1 Alliance Churches” del CAMACOP y mga privado individual quien ya man hunto y suporta con el mision medical que ya beneficia mga residentes del Barangay Tubigan y sercanos barrios na Maluso, Basilan. (B. Garcia)