Total de siento sincuenta’y cuatro mga casual y constractual empleyado ya hura del Bieyernes tarde na consejo del ciudad.
El Alcalde John Dalipe amo el ya administra de ila huramiento quien na mismo tiempo ya recivi y ya saluda canila en Hora Buena cay ya escuji canila el mga elejido oficiales del ciudad.
Si Dalipe ya habla con el mga nuevo empleyado cay mucho sila cosa que aprende particularmente na asida del resoluciones y mga ordinansa.
Si Dalipe ya apela con el mga nuevo empleyado del consejo local para coopera con el de ila cada’y cual hefe del oficina, que es le mga consejales del ciudad.
Ya asegura tamen el joven alcalde cay ay dale le todo’l suporta ta necesita el consejo del ciudad bajo el liderato de Vise Alcalde Josephine Pareja.
Na parte de Pareja, alegre ele por el mga suporta ta recivi sila desde con Dalipe. (Bong Garcia)