Mga personajes del pulisiya ya aresta con tres personas y ya confisca valor de tres punto ocho milyones de pesos smuggled cigarillo del Domingo madrogada alla ma provincial del Zamboanga del Sur.
Si Coronel Richard Verceles, operations chief del Area Police Command-Western Mindanao, ya nombra con mga aresta personas como canda Al Ibrahim, chufer de trak, y su dos ayudante si Nadz Ismael y Madzmur Sahipa.
Asegun con Verceles ya aresta con el tres personas despues que ya puede cuji mga pulis con un trak lleno de smuggled cigarillo maga alas tres de Domingo madrogada na Purok Talaba, Barangay Camanga, Dumalinao, Zamboanga del Sur.
Si Verceles ya habla cay mga pulis, con el coordinacion con el Buro de Aduana, ya pone un checkpoint na Purok Talaba, Barangay Camanga, despues que ya recivi sila informacion cay tiene un trak lleno de contrabando el esperansao pasa na lugar.
Asegun con Verceles cay el trak ta maneja si Ibrahim ta carga siento nueve carton de cigarillo que tiene el valor de tres punto ocho milyones de pesos.
Mga pulis ya aresta y ya confisca con el trak, incluwido el carga, cay nohay puede presenta si Ibrahim y su dos uban mga document del de ila cargamento.
Si Ibrahim, su dos companieros, hasta el trak y cargamento ya pone bajo el custodiya del pulis na Dumalinao en preparacion para entraga na Buro de Aduana. (Bong Garcia)