El City Peace and Order Council (CPOC) que ta encabesa el Alcalde John Dalipe ta plaña adopta sistema de dalida premio monetario para con aquellos quien puede dale vital informacion que ay resulta na identificacion y aresto del mga suspechao de matansa na ciudad.
El adoptada del sistema de dalida premio monetario amo para dale el corage con el publico para conversa y testifica contra con mga personas envuelto na matansa o incidente de tiroteo.
Si Dr. Elmeir Jade Apolinario, el jefe del City Disaster Risk Reduction and Management Office, ya ase el sugestion que adopta con el sistema durante el hunta del CPOC del Lunes despues que ya reporta si Police Colonel Kimberly Molitas, el director del Zamboanga City Police Office, cay ta enfrenta sila desafio solve con mga asuntos de matansa cay nohay quien quiere man testigo.
Ya lamenta si Molitas cay mayoriya del mga gente na mga barrio hinde ta man cuento maskin ya puede sila mira con el incidente, incluido ya hasta con el mga suspechao.
Mientras tanto, si Molitas ya reporta cay tiene ya el toral de 23 asuntos de matansa el ya registra na ciudad desde Enero uno, este año.
Asegun con Molitas, siete del 23 asuntos de matansa ya ocuri del mes de Enero, nueve del Febrero y siete del mes de Marso. (B. Garcia)