Un conocido vendedor de droga ilegal el ya aresta y valor de P340,000 shabu el ya confisca el mga autoridad na un operacion contra droga na ciudad de Zamboanga, asegun con el policia local del Domingo.
El policia local ya nombra con el arestao suspechao como si Fadzlor Munong, 50 años el edad y residente de Barangay Baliwasan, ciudad de Zamboanga.
Asegun con el policia, con Munong ya aresta na un operacion de compra busto del Sabado denoche na Barangay Tugbungan, ciudad de Zamboanga.
Asegun con el policia, ya confisca na posesion de Munong 50 gramos de suspechao shabu que tiene el valor de P340,000, y dinero de compra busto.
El operacion de compra busto ya conduci contra co Munong siguiendo del bisiada el mga autoridad aserca su ilegal actividad.
Con Munong ya detene na carcel del policia local en preparacion para el plantada del asunto contra conele por violacion del Ley Integral de Drogas Peligrosas de 2002. (B. Garcia)