Un trabajante de construccion el ya salva pero irido na un incidente de tiroteo na ciudad de Lamitan na provincia del Basilan, asegun con el policia del Miercoles.
Asegun con el policia, el incidente ya ocuri mga alas 6:50 del Lunes denoche na Sitio Tinog, Barangay Ubit, ciudad de Lamitan, Basilan.
Asegun con el policia, con el victima ya conose como si Adsman Jalilul, 50 años el edad y residente del Sitio Tinog, Barangay Ubit.
Base na investigacion del policia, ta laba plato y mga caldero si Jalilul adentro del su casa cuando ya tira con ele el un desconosido armao persona quien ya escapa corriendo despues del incidente.
Si Jalilul ya sufri un irida de bala que ya tupa abajo del su izquierda orejas y ya man lampas para abajo del derecha orejas.
Con Jalilul ya lleva na hospital para el curada medical y ta esta admitido base na consejo del doctor.
El policia del ciudad de Lamitan ta continua de ila investigacion para establisa si cosa el motivo y si quien el echor del incidente. (B. Garcia) (Photo Courtesy of Ronda del Basilan)
