Un 52 años mujer el ya muri na un accidente vehicular envuelto el un trak y un motorsiclo na costa este del ciudad, asegun con el policia local del Miercoles.
El policia local ya nombra con el victima como si Eloisa Evangelista, un residente del Purok 4, Barangay Bolong na costa este del ciudad.
Asegun con el policia, el accidente vehicular ya ocuri mga alas 2:50 del Martes tarde na Purok 2, na camino de desvio, Barangay Bolong, en este ciudad.
Base na investigacion, ta maneja si Evangelista un motorsiclo cuando ya man bangga conele el un trak que ta maneja si Joseph Saavedra, 49 años el edad, cuando pa birada le para na lao derecha na direccion del camino de desvio.
Si Evangelista ya bula por cuantos metros desde su motorsiclo y ya sufri irida na diferentes parte del cuerpo como resulta del fuersa del bangga.
Con Evangelista ya lleva na hospital y ya rebenta su resuello mga alas 3:20 del Martes tarde mientras bajo el curada medical.
Nohay pasa nada con Saavedra, el chufer del trak, quien bajo na cusotdia de Zamboanga City Police Station 3. (B. Garcia)
