Si Lieutenant General William Gonzales, el comandante de Western Mindanao Command (Westmincom) y si Brigadier General Edmundo Peralta, el hefe del Intelligence Service of the Armed Forces of the Philippines (ISAFP), ya extende palabra de gratitud y comendacion a uno’y otro.
Ese el cosa ya socede cuando ya visita de cortesia si Peralta con Gonzales na quartel del Westmincom na Campo Navarro, Barangay Calarian aqui na ciudad del Martes.
“Bueno se ansina ta puede came man hunta y dale mira de amon suporta a uno’y otro para el bien del de amon respectivo mando y del fuersa armada del Pilipinas,” si Gonzales ya habla despues de ila hunta de Peralta.
Con Peralta, durante su visitada na Campo Navarro, ya recivi con honor militar que ya rindi mga oficiales y personajes del Westmincom.
Con Peralta ya nombra como el hefe del ISAFP del otro mes, y el su visitada parte de visita inaugural con mga mayor y unificao mando del fuersa armada del Pilipinas. (B. Garcia) (Photo Courtesy of Westmincom PIO)
