Cuatro pescador el ya salva mga personjes del Philippine Coast Guard (PCG) serca na un isla del ciudad del Zamboanga, asegun con el PCG del Viernes.
Asegun con el Coast Guard District Southwestern Mindanao (CGDSWM), con el cuatro pescador ya salva mga personajes del Coast Guard Sub-Station (CGSS)-Sangali na este parte del Tumalutab, en este ciudad, del Jueves.
El CGDSWM nohay mas anuncia el mga nombre del cuatro pescador hablando cay todo sila mga residentes de barangay Sangali.
Base na investigacion, ya sumi de ila dos baroto con makina del cuatro pescador cuando ya dale canila encuentro grande-grande marjida mientras ta pesca sila na vicinidad del isla de Tumalutab.
Cuando ya recivi el informacion, el mga personajes del CGSS-Sangali, usando un lancha rapida (speedboat) hunto con dos baroto con makina, enseguidas ya anda na isla de Tumalutab y ya puede salva con el cuatro pescador.
Asegun con el CGDSWM, todo’l cuatro pescador na buen condicion el salud cuando ya salva canila mga personajes del CGSS-Sangali.
Con el mga baroto de makina del mga pescador ya hila para na pantalan del Sangali mientras con el cuatro pescador ya entrega na de ila cada’y cual pamilia y enbuenamente sila ya bolbe. (B. Garcia, photo courtesy of CGSS-Sangali)